Сәрсенбі күні, қарашаның 23-і күні Страсбургте Еуропалық Одақ парламенті Ресейдің Украинаға қарсы әскери агрессиясына байланысты Ресейді терроризмнің демеушісі деп тану туралы қарарды көпшілік дауыспен қабылдауға дауыс берді.
Ресейді терроризмнің демеушісі деп жариялаған Еуропарламент депутаттары Ресей президенті Владимир Путин мен Ресей үкіметін халықаралық трибунал алдында жауапқа тартуға негіз дайындамақшы, деп хабарлайды Еуропарламент сайты.
Бұл қарарды 575 депутат қолдады. Сондай-ақ 8-і қарсы болса, 24-і қалыс қалғаны хабарланды.
Құжатта Еуропарламент Ресейдің Украинадағы «тұрғын үйлер мен азаматтық инфрақұрылымға бей-берекет шабуылдар жасап, нәтижесінде мыңдаған адам қаза тапқанын» мойындады. Басқыншылар басып алынған аумақтарда «сотсыз және тергеусіз өлім жазасына кесіледі, адам ұрлау, сексуалдық зорлық-зомбылық, азаптау және басқа да зұлымдық әрекеттерін жасайды», - делінген қарарда. Бух, Ирпен, Изюм және Лаймандағы жаппай кісі өлтірулер, Мариуполь театры мен Краматорск вокзалына жасалған шабуылдар да айтылды.
Владимир Зеленский Еуропарламенттің шешіміне қатысты:
«Мен Еуропарламенттің Ресейді терроризмді демеуші мемлекет және терроризм құралдарын қолданатын мемлекет ретінде тану туралы шешімін құптаймын. Украинада және әлемде ұзақ жылдар бойы жалғасып келе жатқан лаңкестік саясатына нүкте қою үшін Ресей барлық деңгейде оқшауланып, жауапқа тартылуы керек» деді.
Ресейдің Украинаның азаматтық инфрақұрылымына шабуылдарының күшеюіне байланысты Еуропарламент ЕО-ны Ресей Федерациясына қарсы тоғызыншы санкциялар пакеті бойынша жұмысты тездетуге шақырды.
