Украинада жақын күндері бірнеше облыс «қызыл» аймаққа түсуі мүмкін. Бұл туралы 6 қазанда үкіметтің кезекті отырысында премьер-министр Денис Шмихал мәлімдеді.
«Бұл дегеніміз, кинотеатрлар, кафелер, мейрамханалар, спорт залдары, театрлар және басқа да қоғамдық орындар мекеме қызметкерлерінің 100 пайызы, келушілердің 100 пайызы толық вакцинациядан өткен жағдайда ғана жұмыс істей алады. Кәсіпорын тиісті вакцинация сертификаттарының бар-жоғын тексеруі керек. Біз кәсіпкерлерден бұған жауапкершілікпен қарауды сұраймыз», - деді Премьер-Министр.
Оның айтуынша, полиция және басқа да уәкілетті органдар қызметкерлерінің тиісті техникалық мүмкіндіктері бар, соның арқасында олар келушілерде ковид-сертификаттардың бар-жоғын тексереді.
Шмихал сондай-ақ «қызыл» карантиндік аймақта оқу орындары қызметкерлердің 100% толық вакцинация курсын аяқтаған жағдайда ғана оффлайн режимде жұмыс істейтінін атап өтті.
«Балабақшалар мен мектептердің 1-4-сыныптары әдеттегідей күндізгі форматта жұмысын жалғастырады», - деді Үкімет басшысы.
Және ол осы аптаның басында мектеп қызметкерлерінің 81% дерлік кем дегенде бір дозамен вакцинацияланғанын қосты. Бұл оның айтуынша, мұндай оқу орындарының көпшілігіне «сары» аймақта қалыпты жұмыс істеуге мүмкіндік береді.