Франция мен Швеция сарапшылары ресейлік оппозиция жетекшісі Алексей Навальныйдың «Новичок» тобының затымен уланғанын растады. Бұл туралы Германия федералды үкіметінің баспасөз хатшысы Штеффен Зайберт мәлімдеді.
Бұған дейін Бундесвердің мамандандырылған зертханасының мамандары Навальныйдан алынған биоматериал үлгілеріне токсикологиялық зерттеу жүргізіп, саясаткердің улануына «Новичок» тобынан шыққан жүйкеге әсер ететін зат себеп болғанын анықтаған.
«Бұл Химиялық қаруға тыйым салу туралы конвенцияны өрескел бұзу болып табылады. Сондықтан федералды үкімет Химиялық қаруға тыйым салу ұйымына Навальныйдың ісіне қатысты дәлелдемелерді талдауға көмектесуін сұрап жүгінді», - деді Германия үкіметі.
Оның үстіне федералды үкімет еуропалық серіктестер ретінде Франция мен Швециядан Навальныйдан алынған жаңа үлгілер негізінде неміс мамандарының айғақтарына тәуелсіз сараптама жүргізуді талап етті. Нәтижесінде Франция мен Швецияның мамандандырылған зертханалары Навальныйдың «Новичокпен» уланғаны туралы Германияның қорытындысын растады.
«Біз тағы да Ресейді осы оқиғаға қатысты мәлімдеме жасауға шақырамыз», - деп жазылған Германия үкіметінің жолдауында.
Естеріңізге сала кетейік, Навальный 20 тамызда Томскіден Мәскеуге ұшатын ұшақта ауырып қалған болатын. Ұшақ Омбыға шұғыл қонып, комаға түскен оппозиционер аурухананың жансақтау бөліміне жатқызылды. 22 тамызда ол Германияға емделу үшін Берлиндегі Charite клиникасына жеткізілді.
2 қыркүйекте Германия билігі ресейлік оппозиция жетекшісінің денесінен «Новичок» тобының удың ізі табылғанын хабарлады. 7 қыркүйекте Навальный индукциялық комадан шығарылды, оның жағдайы жақсарды.
