Қазақстан Республикасының Сыртқы істер министрлігі АҚШ Мемлекеттік хатшысы Энтони Блинкеннің Қазақстанға сапарының дайындығы туралы хабарлады. Ол келесі аптада – 28 ақпанда өтеді.
«Астанаға сапары барысында Мемлекеттік хатшыны Президент Қасым-Жомарт Тоқаев қабылдап, Қазақстан Республикасы Премьер-Министрінің орынбасары - Сыртқы істер министрі Мұхтар Тілеубердімен келіссөздер жүргізеді», - делінген хабарламада.
Осы күні Астанада Блинкеннің қатысуымен Орталық Азия елдері мен АҚШ сыртқы саясат ведомстволары басшыларының С5+1 форматындағы министрлік кездесуі өтеді. Күн тәртібінде АҚШ-пен аймақтық ынтымақтастық пен серіктестікті одан әрі дамыту мәселесі тұр.
Естеріңізге сала кетейік, біздің сыртқы саясат ведомстволарының басшылары былтыр мамырда Вашингтонда бас қосты. Сол кезде Блинкен мырза «біздің әріптестігіміз АҚШ-тың Қазақстанның тәуелсіздігіне, егемендігі мен аумақтық тұтастығына мызғымас адалдығына негізделгенін» атап өтіп, өз еліне еліміздегі реформаларға көмектесуге уәде берді.
