Қытайдың оңтүстік-батысындағы Сычуань провинциясында 6,8 балдық жер сілкінісі салдарынан 65 адам қаза тапты.
Құтқарушылар Гардзе-Тибет автономиялық округінде қаза тапқан 37 адамның денесін тапты, тағы 12 адам із-түзсіз жоғалған деп саналады. Яань қаласының ауданында 28 адам қаза тапты. Сондай-ақ аталған аудандардың 248 тұрғыны зардап шекті, олардың төрттен бірі ауыр жарақат алды.
Сычуань провинциясындағы табиғи апат салдарынан жолдар, электр желілері мен байланыс инфрақұрылымы зақымданған. Үйінді астындағы адамдарды іздеу жұмыстары жалғасуда.
Алдыңғы түні Сычуань билігі 50 мың адамды уақытша эвакуациялады. Қытай үкіметі апаттық-құтқару жұмыстары мен жер сілкінісінің салдарын жоюға 50 миллион юань (шамамен 7,25 миллион доллар) бөлді.
Күшті жер сілкіністері тіркелген Гардзе-Тибет автономиялық округінде 1,1 миллионнан астам адам тұрады. Жер сілкінісінің ошағы Лудин уезінде, 16 шақырым тереңдікте орналасқан.
