Олимпиада алауының эстафетасы Жапония бойынша 121 күндік сапарын бастады. Бұл туралы Олимпиаданың сайтында хабарланды.
Салтанатты шара Фукусима префектурасындағы стадионда басталып, коронавирустық пандемияға байланысты көрермендерсіз өтті.
2011 жылғы футболдан әлем чемпионатында жеңіске жеткен Жапония құрамасының сапында ойнаған футболшы Азуса Ивасимизу эстафетаның алғашқы қатысушысы болды.
Келесі кезекте эстафета Жапонияның барлық префектураларында, 23 шілдеде Олимпиаданың ашылуына дейін өтеді.
Естеріңізге сала кетейік, Токиодағы Олимпиада 2020 жылдың жазында өтуі керек еді, бірақ коронавирустық пандемияға байланысты ол кейінге қалдырылды. Нәтижесінде Олимпиада 23 шілде мен 8 тамыз аралығында, Паралимпиада 24 тамыз бен 5 қыркүйек аралығында өтеді.
