Қырғызстан президенті Сооронбай Жээнбеков 6 қазанда елдегі саяси жағдайға қатысты мәлімдеме жасады. Бұл туралы президенттің жолдауында айтылған.
Оның айтуынша, кеше түнде кейбір саяси күштер Қырғызстанда мемлекеттік билікті заңсыз басып алуға әрекеттенген.
«Сайлау нәтижелерін себеп ретінде пайдаланып, олар қоғамдық тәртіпті бұзды. Олар азаматтардың тыныш өмірін бұзды. Олар тәртіп сақшыларына бағынбай, дәрігерлерді ұрып-соғып, ғимараттарды бүлдірді», - деді Жээнбеков.
Ол бір азаматтың өміріне қауіп төндірмеу үшін құқық қорғау органдарына оқ атпауды, қан төкпеуді бұйырғанын айтты.
«Осы уақытқа дейін біз жағдайдың шиеленісуіне жол бермеу үшін барлық шараларды қолдандық. Мемлекеттегі тыныштық, қоғамның тұрақтылығы кез келген депутаттық мандаттан қымбат», - делінген хабарламада.
Жээнбеков Орталық сайлау комиссиясына заң бұзушылықтарды жан-жақты тексеріп, қажет болған жағдайда сайлау нәтижелерін жоюды ұсынды.
«Мен саяси партиялардың жетекшілерін өз жақтастарын сабырға шақырып, оларды көпшіліктен алыстатуға шақырамын. Барша отандастарымды тыныштықты сақтауға, арандатушы күштердің үндеуіне көнбеуге шақырамын. Еліміздің тыныштығы, қоғамымыздың қауіпсіздігі ең бастысы. Мен барлық күштерді ел тағдырын саяси амбициялардан жоғары қоюға және құқықтық алаңға оралуға шақырамын», - деді Қырғызстан президенті.
Естеріңізге сала кетейік, 5 қазан күні кешке Қырғызстан астанасы Бішкекте өткен парламенттік сайлаудың нәтижесімен келіспейтіндердің жаппай наразылығы басталды. Бірқатар оппозициялық партиялар сайлау процесіндегі жаппай заң бұзушылықтар мен бұрмалауларға байланысты сайлау нәтижелерін мойындамайтынын мәлімдеді. Екі сағатқа созылған қақтығыстардан кейін наразылық білдірушілер Қырғызстан мемлекеті басшысының әкімшілігі орналасқан парламент ғимаратына басып кіріп үлгерді. Тәртіпсіздік салдарынан 130-дан астам адам зардап шекті, Ішкі істер министрлігінің патрульдік көлігі жанып кетті, алты жедел жәрдем көлігі зақымданды.