Украина мен Біріккен Араб Әмірліктері 3 миллиард долларды құрайтын меморандумдар мен келісімшарттарға қол қойды.
«Украина Президенті Владимир Зеленскийдің Біріккен Араб Әмірліктеріне ресми сапары аясында украин делегациясы жалпы сомасы 3 миллиард доллар болатын бірқатар меморандумдар мен келісімшарттарға қол қойды», - делінген хабарламада.
Атап айтқанда, Украинаның Мемлекеттік мүлік қоры мен «Мубадала» инвестициялық қоры арасында өзара түсіністік туралы меморандумдарға қол қойылды. Олар перспективалық инвестициялық жобаларды дамыту және Әмірліктің Украинадағы мемлекеттік мүлікті жекешелендіру бағдарламасына қатысуы аясындағы ынтымақтастықты тереңдетуге бағытталған.
«Барлық халықаралық кездесулерде мен Украинаға инвестиция салуға шақырамын. Біздің мемлекеттің үлкен әлеуеті бар: геосаяси жағдайы, табиғи ресурстары, білімді адамдары. Қазір осы әлеуетті іске асырып, қуатты экономика құрудың уақыты келді», - деді Зеленский.
Ол инвестиция тарту Украинаның экономикалық өсуінің кілті екенін атап өтті. «Абу-Даби үкіметінің «Мубадала» мемлекеттік инвестициялық қорымен Украинаға инвестиция салу ниеті туралы меморандумға қол қою Батыс Азиядан Украинаға ауқымды инвестицияларға жол ашудағы өте маңызды қадам», - делінген хабарламада.
Сонымен қатар, Украинаның Цифрлық трансформация министрлігі INTELMAX Management Consulting компаниясымен меморандумға қол қойды, ол Fantom блокчейн негізінде зияткерлік меншікпен алмасу платформасын құру бойынша ынтымақтастықты қарастырады, бұл қауіпсіздік пен ашықтықты арттыруды қамтамасыз етеді. Сондай-ақ мемлекеттік процестер мен қызметтерге блокчейн технологиясын енгізу жоспарлануда.
Тараптар сондай-ақ қорғаныс саласындағы құжаттарға қол қойды, оның аясында, атап айтқанда, Украинадан тыс жерде бірлескен зауыттар салу мүмкіндігі талқыланды.
Сонымен қатар, ауыл шаруашылығы саласында азық-түлік қауіпсіздігін қамтамасыз ету үшін агрохаб пен сауда компаниясын құруды көздейтін меморандумға қол қойылды.
Президент кеңсесі хабарлағандай, бірлескен инвестициялар үшін Украинаның егемендік қорын ашу мүмкіндігі де қарастырылуда.
«Сонымен қатар, Interpipe, Dragon Capital, DTEK, Unit City, EastOne, UMG, Ufuture, Fortior сияқты 18 украиндық жеке компания Мубадала мемлекеттік инвестициялық қорымен меморандумға қол қойды», - деп атап өтті ОП.
