Грузияның экс-президенті, қазір Украина президенті жанындағы Ұлттық реформалар кеңесінің атқарушы комитетінің басшысы Михаил Саакашвили 31 қазандағы парламент сайлауында оппозиция жеңіске жеткен жағдайда Грузияның премьер-министрі болуға келісті. Бұл туралы ол өзінің Telegram-каналында хабарлады.
«Мен 31 қазанда өткен парламенттік сайлауда жеңіске жеткеннен кейін Грузияның біріккен оппозициясының премьер-министр болу ұсынысына келістім. Өйткені, қазір парламент сайлауы Украинада емес, Грузияда өтіп жатыр. Әрине, мен грузин халқыма дағдарыстан шығуға көмектескім келеді. Сондықтан мен Грузияның қазіргі терең дағдарысын еңсере алмағанша, толық мерзімге емес, тұрақтандыру кезеңіне өтпелі премьер-министр болуға келісетінімді жарияладым», - деп жазды Саакашвили.
Ол қазір Украинада екенін және Ұлттық реформалар кеңесінің атқару комитетінің басшысы ретінде өз функцияларын орындайтынын, сондай-ақ Украинаны аралап, тұрақты жұмыс істейтінін қосты.
«Мен үшін Украина мен Грузияның тағдыры ажырамас. Мен екі елдің бірін таңдамаймын, менің күресім мұнда да, онда да жалғасуда», - деді Саакашвили.
