Ресей президенті Владимир Путин дүйсенбі, 10 қаңтарда ҰҚШҰ отырысында Қазақстандағы наразылықтар кезінде «Майдан технологиялары» қолданылғанын айтты.
Оның айтуынша, Қазақстандағы наразылық акциялары агрессия әрекеті болып саналады, оған кідіріссіз әрекет ету қажет болды.
«Қазақстандағы жағдай біртіндеп қалыпқа келуде, бірқатар өмірлік маңызы бар нысандар содырлардан толығымен тазартылды», - деді Ресей президенті.
Ол ҰҚШҰ бітімгершілік контингентінің Қазақстанда шектеулі мерзімге болатынын және елден шығарылатынын атап өтті. Путин ҰҚШҰ операциясын өте уақтылы және заңды деп атады. Оның айтуынша, Қазақстан жағдайында ҰҚШҰ іс жүзінде өзінің әлеуетін, жылдам, шешуші және тиімді әрекет ету қабілетін көрсетті.
Путин Қазақстанға төнген қауіп стихиялық наразылықтардан емес, кімнің қолына қару алды деген тақырыптан туындады деп отыр. Оның айтуынша, Қазақстан халықаралық терроризммен бетпе-бет келді.
Ресей Федерациясының Президенті сондай-ақ ҰҚШҰ елдері ішкі жағдайдың шайқалуына және «түрлі-түсті революциялар» сценарийлерінің жүзеге асуына жол бермейтіндерін көрсетті деп мәлімдеді.
Өз кезегінде Қазақстан Президенті Қасым-Жомарт Тоқаев кездесу барысында елде толық тәртіп орнағанын мәлімдеді.
Естеріңізге сала кетейік, соңғы мәліметтер бойынша Қазақстандағы наразылық кезінде кем дегенде 164 адам, оның ішінде екі бала қаза тапты. Қайтыс болғандардың көбі Алматыда. 6 мыңға жуық адам ұсталды.
