Украина президенті Владимир Зеленский «Қоғамдық өмірге айтарлықтай экономикалық немесе саяси салмағы бар тұлғалардың (олигархтардың) шамадан тыс ықпал етуіне байланысты ұлттық қауіпсіздікке төнетін қатерлердің алдын алу туралы» заң жобасын шұғыл түрде Жоғарғы Радаға ұсынды. Бұл туралы Президенттің іс басқармасынан хабарлады.
Бұл құжатта елдің экономикалық және саяси өміріне елеулі ықпал ететін, сондай-ақ медиа-кеңістіктің негізгі сегменттерін бақылайтын тұлғалар – олигархтар деп аталатындарға анықтама берілген.
Заң жобасы олигарх анықтамасына жататын адамдардың негізгі құқықтарын бұзбайды, тек осы тұлғалардың шеңберін белгілеп, олардың билік өкілдерімен ашық қарым-қатынасының ережелерін белгілейді.
Ол, атап айтқанда, билік өкілдерінің қомақты активтері бар тұлғалармен кездесулері мен басқа да қарым-қатынастарын реттейтін болады.
Құжаттың шектеулі әрекет ету мерзімі 10 жыл. Бұл Украинадағы олигархиялық жүйені жоюдың алғашқы қадамы болуы керек. Оның негізінде монополияға қарсы заңдар, лоббизм туралы заң және басқа да нормативтік құқықтық актілер әзірленіп, елдегі экономикалық және қоғамдық қатынастарды қайта қалыптастырады.
Осы заң жобасына бастамашы бола отырып, Зеленский Украинаның қоғамдық-саяси құрылымын түбегейлі өзгертуге саяси ерік-жігерін көрсетеді.
Басқа да табысты мемлекеттердің тәжірибесі көрсетіп отырғанындай, бірқатар іріктелген тұлғалардың монополиялық жағдайын жою орта таптың дамуына серпін беріп, экономиканың дамуын жеделдетеді.
