Украина азаматтарын Сириядан эвакуациялау бойынша күрделі операция Жаңа жыл түні аяқталды. Бұл туралы Украина президентінің ресми сайтында хабарланды.
Сирияның солтүстік-шығысындағы босқындар лагерінде болған екі әйел мен жеті бала отбасына оралды. Оларды қайтару жоспарын Владимир Зеленский өзі келісіп, үйлестірген.
2019 жылдың маусымында арнайы жұмыс тобы құрылды, оның құрамына Украина қауіпсіздік қызметінің өкілдері кірді. Атап айтқанда, мамандар Сириядағы азаматтарды «Ислам мемлекеті» халықаралық лаңкестік ұйымының мүшелерімен байланысы бар-жоғын тексерді. Ұзақ мерзімді тексерулердің нәтижесі бойынша СБҚ қарсы барлау қызметі аталған азаматтардың лаңкестік әрекетке қатысы бар фактілерді анықтаған жоқ.
Сол жылдың қазан айында Украина билігі ұсынған эвакуациялау шараларының жоспарын мемлекет басшысы бекітті, бірақ Сирия аумағындағы әскери-саяси жағдайдың және қауіпсіздік жағдайының нашарлауына байланысты украиналықтарды эвакуациялау кейінге қалдыруға тура келді.
Сондай-ақ, украиндықтарды алып кету мүмкіндігіне COVID-19 пандемиясы теріс әсер етті. Сирия мен Ирак аумағында коронавирустың таралуына байланысты айтарлықтай шектеулер енгізілді, атап айтқанда, шекаралар жабылып, әуе қатынасы тоқтатылды.
Эвакуация процесіне қайта оралу 2020 жылдың соңында, осы елдердегі қауіпсіздік жағдайы мен эпидемиялық жағдай тұрақтанған кезде ғана мүмкін болды.
Владимир Зеленский Украина мемлекеті басқа елдерде ұсталған өз азаматтарын әрқашан есте сақтайтынын және барлығының елге аман-есен оралуы үшін әрбір украин үшін күресуге дайын екенін бірнеше рет мәлімдеді.
«Себебі, біз үшін адам – ең жоғары құндылық», - деп атап көрсетті Президент.
Украина президенті кеңсесі басшысының орынбасары Роман Машовец азат етілген әйелдер мен балалардың Сирия лагерлерінде ауыр жағдайда болғанын атап өтті.
«Осы сәтті операцияға қатысқандардың барлығына рахмет. Сирия мен Ирактың солтүстігіндегі ұрыс жағдайында өз өмірлерін қатерге тіккендер. Сондай-ақ Украина президенті жанындағы барлау комитетінің нақты ведомствоаралық үйлестіруді жүзеге асырған кәсіби жұмысын атап өткім келеді», - деді Машовец.
Билік өкілдері Сирия лагерлеріндегі басқа украиндарды босату жұмыстары жалғасады деп сендірді.
