Еуропалық Одақ елдері 24 ақпан күні кешке Ресейге қарсы санкциялардың оныншы пакетін қабылдады. Бұл шешімді ЕО Кеңесіндегі Швеция төрағалығы жариялады.
«Еуроодаққа мүше елдер Украинаның соғыста жеңіске жетуіне көмектесу үшін тарихтағы ең күшті және ауқымды санкцияларды бірге енгізді. ЕО Украинамен және украин халқымен біртұтас. Біз Украинаны қанша уақыт қажет болса, қолдаймыз», - делінген хабарламада.
Жаңа пакетте Ресейге қосарлы мақсаттағы өнімдер мен технологиялардың экспортына шектеулер, соғысты қолдайтын, үгіт-насихат тарататын немесе ұшқышсыз ұшақтарды жеткізетін жеке және заңды тұлғаларға бағытталған мақсатты шектеулер, сондай-ақ ресейлік жалған ақпаратқа қарсы тұру шаралары бар.