Украина AstraZeneca компаниясы шығарған коронавирус инфекциясына қарсы вакцинаны алады. Польша 1,2 миллион доза препаратты коммерциялық емес негізде қайта сатады.
Бұл туралы Брюссельде Украина премьер-министрі Денис Шмихалмен өткен брифингте Еуропалық комиссияның вице-президенті Валдис Домбровскис мәлімдеді.
Домбровскистің айтуынша, Еуропалық комиссия бұл вакцинаны Украинаға жеткізуге көмектеседі. «Комиссия келісім-шартты ұйымдастыруға, ЕО азаматтық қорғау механизмі арқылы Польшадан Украинаға тасымалдауға және жеткізуге көмектесуде», - деді ЕО вице-президенті.
Ол сондай-ақ ЕО сатып алу туралы келісімге сәйкес, бұл вакцина коммерциялық емес негізде қайта сатылады деп қосты.
Айта кетейік, AstraZeneca вакцинасын Польшада 60 жастан асқан адамдарды вакцинациялау үшін қолдануға тыйым салынған болатын. Бұл елдегі қарт адамдар әлі де Pfizer және Moderna препараттарымен егілетін болады, ал AstraZeneca вакцинасы, мысалы, мұғалімдерге немесе тиісті жастағы әскери қызметкерлерге енгізіледі. Тиісінше, қажет емес дозалар Украинаға қайта сатылады.
