Украинаның Министрлер кабинеті Денсаулық сақтау министрлігінің оттегімен қамтамасыз ету жүйелері мен тұмауға қарсы вакциналарды сатып алу процедурасын жеңілдету туралы бастамасын қолдады. Тиісті қаулы 9 қыркүйекте өткен үкімет отырысында қабылданды.
Атап айтқанда, үкімет COVID-19-мен күресу үшін оңайлатылған сатып алу рәсіміне жататын және қосылған құн салығынан босатылған тауарлардың, жұмыстардың және қызметтердің тізбесін кеңейтті.
«Коронавирустық ауруға қарсы күресте пайдаланылатын тауарларды, жұмыстарды, көрсетілетін қызметтерді сатып алудың оңайлатылған тәртібі және ҚҚС төлеуден босату туралы Үкіметтің № 224 және № 225 қаулыларына өзгерістер енгізу көзделген. Бұл мәселе оттегімен қамтамасыз ету жүйелеріне, тұмауға қарсы вакциналармен қамтамасыз етуге және COVID-19 ауруын жұқтыру қаупі бар адамдарды вакцинациялауға қатысты», - деді Денсаулық сақтау министрлігінің басшысы Мақсым Степанов.
Естеріңізге сала кетейік, бұған дейін Денсаулық сақтау министрлігі коронавируспен ауыратын науқастарды емдеуге арналған «Ремдесивир» препаратын сатып алуға қаражат бөлуді жеделдеткен болатын.
