Украина Министрлер кабинеті кезекті отырысында ұлттық агроөнеркәсіп кешенін дамытуға бағытталған шешімдер қабылдады. Бұл туралы үкімет сайтында хабарланды.
Премьер-министр Денис Шмигал үкіметтің экологиялық қауіпсіз ирригация, суару және дренажды қамтамасыз ету бойынша нормативтік-құқықтық базаны біріздендіруге кірісіп жатқанын айтты.
«Аграрларымыз бен фермерлеріміз суару жобаларын салудың тиімді жүйесін құруды сұрап үкіметке үнемі жүгініп отырды. Сондықтан келесі жылы біз президентпен бірге «Үлкен құрылыс» бағдарламасын кеңейтіп, Украинаның оңтүстік облыстарында суару жүйелерін құруды жоспарлап отырмыз», - деді ол.
Премьер-Министрдің айтуынша, мұндай жүйелер өнімділікті арттырып, шаруаларды қолайсыз ауа-райынан қорғауы керек.
Сондай-ақ отырыс барысында үкімет шаруа қожалықтарын қолдауға қатысты заңнамаға өзгерістер енгізуді көздейтін заң жобасын мақұлдады.
«Біз ұсынып отырған басты жаңалықтардың қатарында басшысы 35 жасқа толмаған шаруа қожалықтарына мемлекеттік қолдаудың басымдылығын заңнамалық тұрғыдан тану. Өйткені бізде қазір 30 мыңнан астам белсенді шаруа қожалықтары бар және олардың 500-ге жуығын ғана жастар басқарады», - деді Шмихал.
Үкімет басшысы мұндай шаруа қожалықтарының саны алдағы жылдары кем дегенде екі есеге көбейіп, мемлекет оларға белсенді түрде көмектесу керектігін қадап айтты.
